ບໍລິສັດ ນະຄອນຫຼວງອຸດສາຫະກໍາເຫຼັກ ຈໍາກັດ (VSI)ຊ່ວຍເຫຼັກເສັ້ນສ້າງຫ້ອງການ ອຄ ເມືອງ ລ້ອງຊານ
ໃນວັນທີ 25 ພຶດສະພາ 2022 ທີ່ກະຊວງອຸດສາຫະກຳ ແລະ ການຄ້າ ໄດ້ມີພິທີມອບ-ຮັບ ເຫຼັກເສັ້ນ ຈາກບໍລິສັດ ນະຄອນຫຼວງອຸດສາຫະກໍາເຫຼັກ ຈໍາກັດ (VSI) ເພື່ອຊ່ວຍເຫຼືອກໍ່ສ້າງຫ້ອງການອຸດສາຫະກໍາ ແລະ ການຄ້າເມືອງລ້ອງຊານ, ແຂວງໄຊສົມບູນ ທີ່ໄຟໄໝ້ຫ້ອງການ. ໃນພິທີດັ່ງກ່າວ ທ່ານ ຫຼິ້ນ ກ້ວງລີ້, ຜູ້ອໍານວຍການ ບໍລິສັດ ເປັນຜູ້ມອບ ແລະ ຮັບໂດຍ ທ່ານ ບຸນເຖິງ ດວງສະຫວັນ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມດ້ວຍຄະນະກົມອຸດສາຫະກໍາ ແລະ ຫັດຖະກໍາ, ຫ້ອງການກະຊວງ ອຄ ເຂົ້າຮ່ວມ.
ໃນໂອກາດນີ້ ທ່ານ ບູນເຖິງ ດວງສະຫວັນ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ສະແດງຄວາມຂອບໃຈເປັນຢ່າງສູງ ມາຍັງຜູ້ອໍານວຍການພ້ອມດ້ວຍຄະນະທີ່ປະກອບສ່ວນໃນຄັ້ງນີ້ ແລະ ຫ້ອງການກະຊວງຈະໄດ້ນຳໄປມອບຕໍ່ໃຫ້ຫ້ອງການ ອຄ ເມືອງລ້ອງຊານ, ເພື່ອກໍ່ສ້າງຫ້ອງການທີ່ໄດ້ຮັບຜົນກະທົບຈາກອັກຄີໄພ ໃນເດືອນມີນາ 2022 ຜ່ານມາ.
ບໍລິສັດ ນະຄອນຫຼວງອຸດສາຫະກໍາເຫຼັກ ຈໍາກັດ ຕັ້ງຢູ່ບ້ານ ຊຽງຄວນ, ເມືອງ ຫາດຊາຍຟອງ, ນະຄອນຫຼວງວຽງຈັນ ໄດ້ເລີ່ມດຳເນີນການຜະລິດມາແຕ່ປີ 1994. ປະຈຸບັນມີພະນັກງານ-ກຳມະກອນທັງໝົດ 450 ຄົນ, ຍິງ 80 ຄົນ. ສາມາດຜະລິດເຫຼັກເສັ້ນໄດ້ 300.000 ໂຕນ/ປີ ເພື່ອສະໜອງໃຫ້ຜູ້ຊົມໃຊ້ພາຍໃນ ແລະ ສົ່ງອອກ.
