ໂຮງງານຜະລິດຊີມັງ ເຄຊີແອລ ຊ່ວຍຊີມັງໃຫ້ ຫ້ອງການ ອຄ ເມືອງລ້ອງຊານ
ໃນວັນທີ 21 ເມສາ 2022 ທີ່ກະຊວງອຸດສາຫະກຳ ແລະ ການຄ້າ ໄດ້ມີພິທີມອບ-ຮັບ ຊີມັງ 10 ໂຕນ ຈາກບໍລິສັດ ຄໍາມ່ວນ ຊີມັງ ຈໍາກັດ ເພື່ອຊ່ວຍເຫຼືອໃນການກໍ່ສ້າງຫ້ອງການອຸດສາຫະກໍາ ແລະ ການຄ້າເມືອງລ້ອງຊານ, ແຂວງໄຊສົມບູນ ທີ່ໄຟໄໝ້ຫ້ອງການ, ໃນພິທີດັ່ງກ່າວ ທ່ານ ພີລະມາດ ວະຈະນານະວັດ, ຜູ້ອໍານວຍການ ບໍລິສັດ ຄໍາມ່ວນ ຊີມັງ ຈໍາກັດ ເປັນຜູ້ມອບ ແລະ ຮັບໂດຍ ທ່ານ ປອ ມະໂນທອງ ວົງໄຊ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມດ້ວຍຜູ້ຕາງໜ້າຈາກຫ້ອງການກະຊວງ ແລະ ກົມອຸດສາຫະກໍາ ແລະ ຫັດຖະກໍາ ເຂົ້າຮ່ວມ.
ໃນໂອກາດນີ້ ທ່ານ ປອ ມະໂນທອງ ວົງໄຊ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ສະແດງຄວາມຂອບໃຈເປັນຢ່າງສູງ ມາຍັງຜູ້ອໍານວຍການພ້ອມດ້ວຍຄະນະທີ່ປະກອບສ່ວນໃນຄັ້ງນີ້ ແລະ ຫ້ອງການກະຊວງຈະໄດ້ນຳໄປມອບຕໍ່ໃຫ້ຫ້ອງການ ອຄ ເມືອງລ້ອງຊານ, ເພື່ອກໍ່ສ້າງຫ້ອງການທີ່ໄດ້ຮັບຜົນກະທົບຈາກອັກຄີໄພ ໃນເດືອນມີນາ 2022 ຜ່ານມາ.
ບໍລິສັດ ຄໍາມ່ວນ ຊີມັງ ຈໍາກັດ ຕັ້ງຢູ່ບ້ານ ໂພວາ, ເມືອງ ມະຫາໄຊ, ແຂວງ ຄໍາມ່ວນ ໄດ້ເລີ່ມດຳເນີນການຜະລິດມາແຕ່ປີ 2017. ປະຈຸບັນມີພະນັກງານ-ກຳມະກອນທັງໝົດ 497 ຄົນ, ຍິງ 97 ຄົນ. ສາມາດຜະລິດຊີມັງໄດ້ 1.795.000 ໂຕນ/ປີ ເພື່ອສົ່ງອອກໄປພາກອິສານປະເທດໄທ ເປັນຕົ້ນຕໍ ແລະ ສະໜອງພາຍໃນສ່ວນໜຶ່ງ.
