ທ່ານ ບຸນເຖິງ ດວງສະຫວັນ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ພ້ອມດ້ວຍຄະນະລົງເຄື່ອນໄຫວຢ້ຽມຢາມ ແລະ ຊຸກຍູ້ການຜະລິດຝຸ່ນໂປຕາສ ຂອງ ບໍລິສັດ ຊີໂນ-ອາກຣີ ໂປຕາສ ຈຳກັດ
ໃນວັນທີ 12 ສິງຫາ 2022, ທ່ານ ບຸນເຖິງ ດວງສະຫວັນ ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ ພ້ອມດ້ວຍຄະນະ ໄດ້ ລົງເຄື່ອນໄຫວຢ້ຽມຢາມ ແລະ ຊຸກຍູ້ ການຜະລິດເກືອໂປຕາສ ແລະ ຝຸ່ນປະສົມໂປຕາສ ຂອງບໍລິສັດ ຊີໂນ-ອາກຣີ ໂປຕາສ ຈຳກັດ ທີ່ບ້ານດົງໃຕ້, ເມືອງທ່າແຂກ, ແຂວງຄຳມ່ວນ.
ບໍລິສັດ ຊີໂນ-ອາກຣີ ໂປຕາສ ຈຳກັດ ໄດ້ສ້າງຕັ້ງ ໃນເດືອນ ພຶດສະພາ 2009 ເນື້ອທີ່ສຳປະທານ 35 ກມ2 ເພື່ອຂຸດຄົ້ນ ແລະ ປຸງແຕ່ງເກືອໂປຕາສ ມີກໍາລັງການຜະລິດ 2 ແສນໂຕນຕໍ່ປີ ມາຮອດ ທ້າຍປີ 2021 ສາມາດຂະຫຍາຍເພີ່ມການຜະລິດ ເກືອໂປຕາສ ໄດ້ 1 ລ້ານໂຕນ/ປີ. ຜະລິດຕະພັນໄດ້ສົ່ງອອກໄປຕ່າງປະເທດ ເຊັ່ນ ສ.ປ ຈີນ, ຫວຽດນາມ, ອິນໂດເນເຊຍ, ໄທ, ມາເລເຊຍ, ອິນເດຍ, ນິວຊີແລນ ແລະ ຍີ່ປຸ່ນ. ບໍລິສັດມີແຜນຈະສືບຕໍ່ລົງທຶນຕື່ມອີກປະມານ 350 ລ້ານໂດລາສະ ຫະລັດ ເພື່ອຂະຫຍາຍໂຄງການເກືອໂປຕາສ ຄາດວ່າ 3 ຫາ 5 ປີຕໍ່ໜ້າ ຈະບັນລຸການຜະລິດເກືອໂປຕາສ ປະມານ5 ລ້ານໂຕນ/ປີ.
ໃນປະຈຸບັນ ບໍລິສັດ ຊີໂນ-ອາກຣີ ໂປຕາສ ມີພະນັກງານ ແລະ ກຳມະກອນທັງໝົດ 1.857 ຄົນ (ຍິງ 156 ຄົນ); ໃນນີ້, ເປັນຄົນລາວ 1.252 ຄົນ (ຍິງ 113 ຄົນ) ແລະ ອີກ 5 ປີ ຕໍ່ໜ້າຈະມີພະນັກງານ ແລະ ກຳມະກອນ ຫຼາຍກວ່າ 3.000 ຄົນ. ບໍລິສັດໄດ້ມອບພັນທະດ້ານ ພາສີ-ອາກອນ ໃຫ້ລັດຖະບານຢ່າງຄົບຖ້ວນຕາມສັນຍາ ແລະຊ່ວຍປະກອບສ່ວນພັດທະນາຊຸມຊົນທ້ອງຖິ່ນ ເຊັ່ນ: ສ້າງໂຮງຮຽນ, ເສັ້ນທາງ, ວັດວາອາຮາມ ແລະ ອື່ນໆ.
ນອກຈາກການຜະລິດເກືອໂປຕາສ ແລ້ວ, ບໍລິສັດ ຍັງມີແຜນພັດທະນານິຄົມອຸດສາຫະກຳໜູນວຽນອັດສະລີຍະອາຊີໂປຕາສ ສາກົນ ຊຶ່ງປະກອບມີ 3 ເຂດໃຫ່ຍ ຄື: ເຂດອຸດສາຫະກຳຝຸ່ນໂປຕາສ ແລະ ເຄມີເກືອ; ເຂດອຸດສາຫະກຳສຸຂະພາບຂະໜາດໃຫ່ຍນຳໃຊ້ເຕັກໂນໂລຊີສູງ ແລະ ເຂດເມືອງອັດສະລິຍະອາຊີໂປຕາສ ໂດຍໄດ້ວາງແຜນຈະໃຫ້ສຳເລັດໃນທ້າຍປີ 2024 ໃນມູນຄ່າການລົງທຶນ ທັງໝົດ 2,5 ຕື້ໂດລາສາຫະລັດ.
ໃນໂອກາດນີ້ທ່ານ ບຸນເຖິງ ດວງສະຫວັນ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ໄດ້ ສະແດງຄວາມຊົມເຊີຍ ຕໍ່ການເອົາໃຈໃສ່ ໃນການດໍາເນີນ ແລະ ຂະຫຍາຍທຸລະກິດ ຂອງບໍລິສັດ ຊີໂນ-ອາກຣີ ໂປຕາສ ຈໍາກັດ . ພ້ອມກັນນີ້ກໍ່ໄດ້ໃຫ້ທິດຊິ້ນຳຕໍ່ກັບການຜະລິດເກືອໂປຕາສ ແລະ ການສະເໜີພັດທະນາໂຄງການນິຄົມອຸດສາຫະກໍາ ດັ່ງນີ້: ໃຫ້ບໍລິສັດສືບຕໍ່ເອົາໃຈໃສ່ປະຕິບັດຕາມກົດໝາຍ ແລະ ລະບຽບການທີ່ກ່ຽວພັນກັບການດຳເນີນທຸລະກິດຢ່າງເຄັງຄັດ ໂດຍສະເພາະແມ່ນການປົກປັກຮັກສາສິ່ງແວດລ້ອມເພື່ອບໍ່ໃຫ້ເກີດຜົນກະທົບຕໍ່ສະພາບແວດລ້ອມ ແລະ ຊຸມຊົນ; ກ່ຽວກັບນະໂຍບາຍຂອງລັດຖະບານ, ຖ້າພົບເຫັນບັນຫາໃດທີ່ຍັງບໍ່ທັນເໝາະສົມ ຫຼື ເປັນຂໍ້ຈໍາກັດໃນການດຳເນີນທຸລະກິດ ແມ່ນໃຫ້ສັງລວມ ແລະ ສະເໜີລາຍງານຫາກະຊວງ ອຄ ແລະ ພາກສ່ວນກ່ຽວຂ້ອງ ເພື່ອ ຄົ້ນຄວ້າ ແລະ ພິຈາລະນາປັບປຸງ ແກ້ໄຂ; ສະເໜີໃຫ້ບໍລິສັດເອົາໃຈໃສ່ຊຸກຍູ້ ແລະ ຖ່າຍທອດຄວາມຮູ້ໃຫ້ພະນັກງານ ແລະ ກຳມະກອນທີ່ເປັນຄົນລາວຕື່ມ ເພື່ອຍົກລະດັບຄວາມຮູ້ ແລະ ຄວາມສາມາດໃຫ້ສູງຂຶ້ນ; ສຳລັບໂຄງການພັດທະນານິຄົມອຸດສາຫະກຳໜູນວຽນອັດສະລີຍະອາຊີໂປຕາສສາກົນ ເຫັນວ່າມີຄວາມສໍາຄັນຕໍ່ການການພັດທະນາອຸດສາຫະກໍາປຸງແຕ່ງເກືອໂປຕາສ ເພື່ອໃຫ້ໄດ້ຜະລິດຕະພັນທີ່ມີມູນຄ່າເພີ່ມສູງ ແລະ ຫຼາກຫຼາຍຊະນິດ ຈາກເກືອດັ່ງກ່າວ, ເປັນການປະກອບສ່ວນໃນການພັດທະນາເສດຖະກິດ-ສັງຄົມ. ກະຊວງອຸດສາຫະກຳ ແລະ ການຄ້າ ມີຄວາມຍິນດີໃຫ້ການຊຸກຍູ້ ແລະ ສະໜັບສະໜູນ ຕາມສິດ ແລະ ພາລະບົດບາດຂອງຕົນ ເພື່ອໃຫ້ໂຄງການດັ່ງກ່າວ ສາມາດພັດທະນາໄດ້.
