ລັດຖະມົນຕີ ກະຊວງ ອຄ, ພ້ອມດ້ວຍຄະນະ ລົງເຮັດວຽກ ແລະ ເຄື່ອນໄຫວລົງຢ້ຽມຢາມໂຮງງານຕັດຫຍິບຂອງບໍລິສັດ ໄຮ-ເທັກ ລາວ ແອບພາເຣວ ຈຳກັດ

ໃນຕອນເຊົ້າ ເວລາ 9.30 ມ, ວັນທີ 06 ຕຸລາ 2021, ທ່ານ ປອ. ຄຳແພງ ໄຊສົມແພງ, ກຳມະການສູນກາງພັກ, ລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມດ້ວຍບັນດາຫົວໜ້າກົມ, ຄະນະຫ້ອງການກະຊວງ ອຄ ແລະ ພະນັກງານຈໍານວນໜື່ງຂອງກະຊວງ ແລະ ພະແນກ ອຄ ນະຄອນຫຼວງ ໄດ້ລົງເຄື່ອນໄຫວຢ້ຽມຢາມໂຮງງານຕັດຫຍິບຂອງບໍລິສັດ ໄຮ-ເທັກ ລາວ ແອບພາເຣວ ຈໍາກັດ ຕັ້ງຢູ່ບ້ານ ໂພນປ່າເປົ້າ, ເມືອງ ສີສັດຕະນາກ, ນະຄອນຫຼວງວຽງຈັນ. ຈຸດປະສົງການລົງເຄື່ອນໄຫວຢ້ຽມຢາມໃນຄັ້ງນີ້ ເພື່ອຕິດຕາມກວດກາການປະຕິບັດ ແລະ ມາດຕະການປ້ອງກັນ ຂອງໂຮງງານ ເພື່ອຄວາມປອດໄພ ແລະ ສະກັດກັ້ນ ໃນໄລຍະການແຜ່ລະບາດຂອງເຊື້ອພະຍາດ ໂຄວິດ 19 ພາຍໃນບໍລິສັດ. ໃນການຢ້ຽມຢາມໃນຄັ້ງນີ້ ໄດ້ຮັບການຕ້ອນຮັບຈາກຄະນະບໍລິຫານຂອງບໍລິສັດ ແລະ ຮັບຟັງການລາຍງານຈາກທ່ານ ຈຳລອງ ເຈນທະນະກິດ ໃນນາມຜູ້ອຳນວຍການບໍລິສັດ ໂດຍໄດ້ລາຍງານສະພາບ ແລະ ການເຄື່ອນໄຫວດໍາເນີນທຸລະກິດໄລຍະຜ່ານມາ ຊຶ່ງບໍລິສັດັ່ງກ່າວ ໄດ້ຖືກສ້າງຕັ້ງຂຶ້ນໃນປີ 1990 ໂດຍຮ່ວມທຶນກັບຕ່າງປະເທດ (ປະເທດໄທ): ລາວຖືຫຸ້ນ 30% ແລະ ໄທ 70% ໂດຍລົງທຶນສ້າງຕັ້ງໂຮງງານຕັດຫຍິບເຄື່ອງນຸ່ງຫົ່ມສົ່ງອອກຕ່າງປະເທດ 100% ໂດຍມີພະນັກງານ ແລະ ກຳມະກອນລາວທັງໝົດ 605 ຄົນ, ເປັນຍິງ 507 ຄົນ. ພະນັກງານທີ່ໄດ້ຮັບການສັກວັກຊີນທັງໝົດ 589 ຄົນ ແລະ ຍັງບໍ່ທັນໄດ້ສັກວັກຊີນ 26 ຄົນ. ໃນປີ 2020 ໄດ້ສົ່ງອອກ ເຄື່ອງນຸ່ງຫົ່ມໄປຕ່າງປະເທດ ເຊັ່ນ: ຕະຫລາດສະຫະພາບຢູໂຣບ ແລະ ປະເທດໄທ, ລວມມູນຄ່າ 10,674,100 ໂດຣາສະຫະລັດ ຫຼື 96,6 ຕື້ ກີບ. ສະເພາະ 9 ເດືອນຕົ້ນປີ 2021 ສາມາດສົ່ງອອກມູນຄ່າ 7,1 ລ້ານໂດລາ ຫຼື 67 ຕື້ກີບ. ນັບແຕ່ມີການລະບາດຂອງພະຍາດ ໂຄວິດ 19 ແຕ່ທ້າຍເດືອນເມສາ 2021 ເປັນຕົ້ນມາ ໄດ້ສົ່ງຜົນກະທົບຕໍ່ກັບໂຮງງານຢ່າງຫຼວງຫຼາຍ ເຊັ່ນ: ການສົ່ງເຄື່ອງໃຫ້ລູກຄ້າບໍ່ທັນຕາມກຳນົດເວລາ ໂດຍຜ່ານທາງເຮືອ, ເຊິ່ງເຮັດໃຫ້ຫຼ້າຊ້າ ແລະ ມີການນຳສົ່ງອອກເພີ່ມຕື່ມ ໄປທາງເຮືອບິນ. ບໍລິສັດ ໄຮ-ເທັກ ລາວ ແອບພາເຣວ ຈໍາກັດ, ຍັງຈໍາຕ້ອງອາໄສສົ່ງເຄື່ອງຈໍານວນໜຶ່ງໃຫ້ໂຮງງານສາຂາອື່ນທີ່ປະເທດໄທ ຊ່ວຍຫຍິບ ແລະ ສົ່ງອອກແທນ.