ທ່ານຮອງຫົວໜ້າກົມອຸດສາຫະກຳ ແລະ ຫັດຖະກຳ, ກະຊວງອຸດສາຫະກຳ ແລະ ການຄ້າ ລົງຊຸກຍູ້ການຜະລິດຢູ່ໂຮງງານວຽງຈັນ ອິນດັດທຣຽນແກັສ໌
ວັນທີ 19 ມັງກອນ 2023 ທ່ານ ສະຫວາດ ຂຸນດາວົງ ຮອງຫົວໜ້າກົມອຸດສາຫະກຳ ແລະ ຫັດຖະກຳ, ກະຊວງອຸດ ສາຫະກຳ ແລະ ການຄ້າ ພ້ອມດ້ວຍຄະນະ ລົງເຄື່ອນໄຫວຊຸກຍູ້ການຜະລິດຢູ່ໂຮງງານວຽງຈັນ ອິນດັດທຣຽນແກັສ໌ ຕັ້ງຢູ່ບ້ານໂຄກສີວິໄລ, ເມືອງໄຊທານີ, ນະຄອນຫຼວງວຽງຈັນ. ດຳເນີນກິດຈະການ ອັດຮ່າຍອາຍອົກຊີແຊນ(CO2), ແກັສ໌ຫຸງຕົ້ມ(LPG), ອາຍອາກອນ(AR) ແລະ ອັດຮ່າຍແກັສ໌ ປະເພດອຸດສາຫະກໍາ ເພື່ອຈຳໜ່າຍພາຍໃນ ແລະ ສົ່ງອອກຕ່າງ ປະເທດ. ຊຶ່ງໄດ້ຮັບການຕ້ອນຮັບຈາກທ່ານ ບຸນກວ້າງ ດັງມະນີ ຮອງຜູ້ອຳນວຍການໂຮງງານ. ໃນລະຫວ່າງການຢ້ຽມ ຢາມ ທ່ານຮອງຫົວໜ້າກົມ ໄດ້ເນັ້ນໃຫ້ໂຮງງານປັບປຸງລະບົບເຕັກນິກໃຫ້ໄດ້ມາຕະຖານ ແລະ ສ້າງເປັນໂຮງງານຕົວແບບ. ໃນນີ້ຕ້ອງເອົາໃຈໃສ່ພິເສດດ້ານຄວາມປອດໄພໂຮງງານ ແລະ ຜະລິດຕະພັນ ເພື່ອເຮັດໃຫ້ຜະລິດຕະພັນມີຄຸນນະພາບ ແລະ ສາມາດສະໜອງໃຫ້ຕະຫຼາດ ໄດ້ຢ່າງພຽງພໍ ແລະ ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມ.
