ກະຊວງອຸດສາຫະກຳ ແລະ ການຄ້າ ເດີນໜ້າພັດທະນາອຸດສາຫະກໍາແບບຍືນຍົງ
ພາຍຫຼັງທີ່ ສຳເລັດການສ້າງແຜນພັດທະນາອຸດສາຫະກໍາປຸງແຕ່ງ ແລະ ຫັດຖະກໍາ 2021-2025 ກະຊວງອຸດສາຫະກໍາ ແລະ ການຄ້າ ກໍ່ເລັ່ງປະຕິບັດບັນດາໜ້າວຽກທີ່ໄດ້ກຳນົດໃນແຜນພັດທະນາດັ່ງກ່າວ ຊຶ່ງໜຶ່ງໃນນັ້ນກໍ່ແມ່ນການພັດທະນາອຸດສາຫະກໍາໃຫ້ເປັນທັນສະໄໝ, ຍືນຍົງ ແລະ ເປັນມິດກັບສິ່ງແວດລ້ອມ.
ປະຈຸບັນກົມອຸດສາຫະກໍາ ແລະ ຫັດຖະກໍາ, ກະຊວງອຸດສາຫະກຳ ແລະ ການຄ້າ ກໍາລັງສຸມໃສ່ການພັດທະນາອຸດສາຫະກໍາ ສີຂຽວ ໂດຍສົ່ງເສີມໃຫ້ບັນດາໂຮງງານອຸດສາຫະກໍາປະຕິບັດເງື່ອນໄຂ ແລະ ຂໍ້ກໍານົດຕ່າງໆ, ໃນປະຈຸບັນໄດ້ມີໂຮງງານຈໍານວນໜຶ່ງໄດ້ຮັບການຮັບຮອງເປັນໂຮງງານອຸດສາຫະກຳສີຂຽວແລ້ວ. ພ້ອມດຽວກັນນີ້ການພັດທະນານິຄົມອຸດສາຫະກຳນີເວດ ກໍ່ແມ່ນວຽກງານໜຶ່ງໃນການພັດທະນາອຸດສາຫະກຳແບບຍືນຍົງ ຊຶ່ງກໍ່ໄດ້ຮັບການເອົາໃຈໃສ່ສົ່ງເສີມ ແລະ ພັດທະນາ.
ເພື່ອເປັນການຍົກລະດັບການພັດທະນາອຸດສາຫະກໍາແບບຍືນຍົງດັ່ງກ່າວໃຫ້ມີຄວາມສາມາດປະຕິບັດໄດ້ດີຍິ່ງຂຶ້ນ ໃນລະຫວ່າງວັນທີ 27 ກຸມພາ – 3 ມີນາ 2023 ນີ້ ທ່ານ ກຽງຄຳ ຣາຊະຈັກ ຮອງຫົວໜ້າກົມອຸດສາຫະກຳ ແລະ ຫັດຖະກຳ, ກະຊວງອຸດສາຫະກຳ ແລະ ການຄ້າ ໄດ້ນໍາພາຄະນະວິຊາການຈາກກົມອຸດສາຫະກຳ ແລະ ຫັດຖະກຳ ແລະ ກົມແຜນການ ແລະ ການຮ່ວມມື, ກະຊວງອຸດສາຫະກຳ ແລະ ການຄ້າ ທັດສະນະສຶກສາ ແລກປ່ຽນ ແລະ ຖອດຖອນບົດຮຽນການປະຕິບັດວຽກງານອຸດສາຫະກຳສີຂຽວ, ເມືອງອຸດສາຫະກຳນິເວດ, ນິຄົມອຸດສາຫະກຳນິເວດ, ການຄຸ້ມຄອງສິ່ງເສດເຫຼືອອຸດສາຫະກຳ ແລະ ແນວທາງການພັດທະນາ ແລະ ການຄຸ້ມຄອງການດຳເນີນກິດຈະການອຸດສາຫະກຳແບບຍືນຍົງ ກັບກົມໂຮງງານ, ກະຊວງອຸດສາຫະກໍາ ແຫ່ງປະເທດໄທ ໂດຍໄດ້ຮັບການສະໜັບສະໜູນຮ່ວມມືຈາກສະມາຄົມວິສະວະກໍາສິ່ງແວດລ້ອມແຫ່ງປະເທດໄທ ແລະ ອົງການສະຫະປະຊາຊາດ ເພື່ອການພັດທະນາອຸດສາຫະກຳ (UNIDO).
ຄະນະໄດ້ພົບ ແລກປ່ຽນບົດຮຽນກັບ ກົມໂຮງງານອຸດສາຫະກຳ, ກະຊວງອຸດສາຫະກຳແຫ່ງປະເທດໄທ, ສະມາຄົມວິສະວະກຳສິ່ງແວດລ້ອມແຫ່ງປະເທດໄທ ພ້ອມດຽວກັນນີ້ ໄດ້ທັດສະນະສຶກສາ ການປະຕິບັດນິຄົມອຸດສາຫະກໍານິເວດ, ການນໍາໃຊ້ສິ່ງເສດເຫຼືອຜະລິດເປັນພະລັງງານ ແລະ ບັນດາໂຮງງານອຸດສາຫະກຳສີຂຽວຕົວແບບທີ່ໄດ້ຮັບອຸດສາຫະກໍາສີຂຽວຂັ້ນ 3, 4, 5 ຈຳນວນໜຶ່ງໃນປະເທດໄທ.
ການເດີນທາງໄປເຮັດວຽກໃນຄັ້ງນີ້ ໄດ້ຮຽນຮູ້ ປະສົມການຂອງປະເທດໄທເປັນຢ່າງດີທີ່ຈະສາມາດນໍາມາປັບປຸງເຂົ້າໃນການປະຕິບັດວຽກງານການສົ່ງເສີມ, ການພັດທະນາອຸດສາຫະກໍາໃຫ້ມີຄວາມຍືນຍົງ ຢູ່ ສ ປປ ລາວ ໃນຕໍ່ໜ້າ.
