ກອງປະຊຸມຜ່ານຮ່າງຍຸດທະສາດພະລັງງານຊີວະມວນ ສຳລັບພາກອຸດສາຫະກຳ ແລະ ເຜີຍແຜ່ຂໍ້ຕົກລົງວ່າດ້ວຍອຸດສາຫະກຳສີຂຽວ
ກົມອຸດສາຫະກຳ ແລະ ຫັດຖະກຳ, ກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມ ຜ່ານຮ່າງຍຸດທະສາດພະລັງງານຊີວະມວນ ສຳລັບພາກອຸດສາຫະກຳ ຂອງ ສປປ ລາວ ແລະ ເຜີຍແຜ່ຂໍ້ຕົກລົງວ່າດ້ວຍອຸດສາຫະ ກຳສີຂຽວ ໃນວັນທີ 19-20 ຕຸລາ 2022 ທີ່ ໂຮງແຮມຣິເວີເຣຍ, ເມືອງທ່າແຂກ, ແຂວງຄຳມ່ວນ ໂດຍການເປັນປະທານຮ່ວມຂອງທ່ານ ບຸນເຖິງ ດວງສະຫວັນ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ແລະ ທ່ານ ບຸນໂຮມ ມຸກດາສັກ ຫົວໜ້າພະແນກອຸດສາຫະກຳ ແລະ ການຄ້າແຂວງຄຳມ່ວນ ມີບັນດາຫົວໜ້າພະແນກ, ຮອງຫົວໜ້າພະແນກ ແລະ ພະນັກງານຈາກພະແນກອຸດສາຫະກຳ ແລະ ການຄ້າແຂວງທົ່ວປະເທດ ແລະ ບັນດານັກທຸລະກິດພາຍໃນແຂວງຄຳມ່ວນ ເຂົ້າຮ່ວມ.
ກອງປະຊຸມໄດ້ຮັບຟັງການຜ່ານຮ່າງຍຸດທະສາດພະລັງງານຊີວະມວນ ສໍາລັບອຸດສາຫະກຳ ໃນ ສປປ ລາວ ເຊິ່ງຮ່າງເອກະສານດັ່ງກ່າວແມ່ນໄດ້ຜ່ານກອງປະຊຸມມາແລ້ວ 1 ຄັ້ງ ຄັ້ງນີ້ເປັນຄັ້ງທີ 2 ເຊິ່ງເປັນກອງປະຊຸມເປີດກວ້າງທົ່ວປະເທດໃນຂະແໜງອຸດສາຫະກຳ ແລະ ການຄ້າ ເຊິ່ງບັນດາຜູ້ເຂົ້າຮ່ວມກໍ່ໄດ້ມີຄຳເຫັນປຶກສາຫາລືແລກ ປ່ຽນເຊິ່ງກັນ ແລະ ກັນ ເພື່ອແນໃສ່ເຮັດໃຫ້ໂຄງຮ່າງ ແລະ ເນື້ອໃນຂອງຮ່າງຍຸດທະສາດດັ່ງກ່າວມີຄວາມຖືກຕ້ອງ ແລະ ສົມບູນ. ພ້ອມນີ້ ກອງປະຊຸມຍັງໄດ້ຮັບຟັງການເຜີຍແຜ່ຂໍ້ຕົກລົງວ່າດ້ວຍອຸດສາຫະກຳສີຂຽວ ແລະ ບົດແນະ ນຳການຈັດຕັ້ງປະຕິບັດຂໍ້ຕົກລົງວ່າດ້ວຍອຸດສາຫະກຳສີຂຽວ ພ້ອມທັງເອກະສານກ່ຽວຂ້ອງອື່ນໆ ເພື່ອແນໃສ່ໃຫ້ຜູ້ເຂົ້າຮ່ວມເຂົ້າໃຈ, ນຳໄປຈັດຕັ້ງຜັນຂະຫຍາຍ ແລະ ຈັດຕັ້ງປະຕິບັດໃຫ້ເປັນເອກະພາບໃນຂອບເຂດທົ່ວປະເທດ.
(ພາບ ແລະ ຂ່າວ ໂດຍ: ກົມອຸດສາຫະກຳ ແລະ ຫັດຖະກຳ, ກະຊວງອຸດສາຫະກຳ ແລະ ການຄ້າ)
