ກອງປະຊຸມ ຄະນະກຳມະການຊີ້ນຳໂຄງການ ຄັ້ງທີ II ແລະ ຜ່ານຮ່າງນະໂຍບາຍອຸດສາຫະກຳສີຂຽວ

September 13, 2022 Khankham

ກົມອຸດສາຫະກຳ ແລະ ຫັດຖະກຳ, ກະຊວງອຸດສາຫະກຳ ແລະ ການຄ້າ ຮ່ວມກັບ ສະຖາບັນເຕີບໂຕສີຂຽວສາກົນ (GGGI) ປະຈໍາ ສປປ ລາວ ໄດ້ຈັດກອງປະຊຸມໃນຫົວຂໍ້: ກອງປະຊຸມຄະນະກຳມະການຊີ້ນຳໂຄງການ ຄັ້ງທີ II ແລະ ກອງປະຊຸມ ຜ່ານຮ່າງນະໂຍບາຍອຸດສາຫະກຳສີຂຽວ ຂຶ້ນໃນວັນທີ 9 ກັນຍາ 2022, ທີ່ໂຮງແຮມແລນມາກ, ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ບຸນເຖິງ ດວງສະ ຫວັນ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ແລະ ທ່ານ ຄຣິດສໂຕບ ອາສິໂກ, ຮອງຫົວໜ້າສະຖາບັນເຕີບໂຕສີຂຽວສາກົນ (GGGI) ປະຈໍາ ສປປ ລາວ ແລະ ປະກອບມີຜູ້ເຂົ້າຮ່ວມທັງໝົດ ຄື: ທ່ານ ຫົວໜ້າກົມ ແລະ ຮອງຫົວໜ້າກົມ ອຸດສາຫະກໍາ ແລະ ຫັດຖະກໍາ, ຜູ້ຕາງໜ້າຈາກອົງການຈັດຕັ້ງສາກົນ, ບັນດາຜູ້ຕາງໜ້າຈາກກະຊວງທີ່ກ່ຽວຂ້ອງ, ສະພາການຄ້າ ແລະ ອຸດສາຫະກໍາແຫ່ງຊາດລາວ ແລະ ພາກທຸລະກິດ ທີ່ກ່ຽວຂ້ອງ. ກອງປະຊຸມໄດ້ດຳເນີນໄປເປັນ ສອງ ວາລະ ດັ່ງນີ້:

ວາລະທີ 1: ກອງປະຊຸມຄະນະກຳມະການຊີ້ນຳໂຄງການຄັ້ງທີ II , ຈຸດປະສົງ ເພື່ອຮັບຟັງການລາຍງານການຈັດຕັ້ງປະຕິບັດວຽກງານຜ່ານມາ ແລະ ວາງແຜນການວຽກງານໃນຕໍ່ໜ້າຂອງໂຄງການ.

ວາລະທີ 2: ກອງປະຊຸມ ຜ່ານຮ່າງນະໂຍບາຍອຸດສາຫະກຳສີຂຽວ, ຈຸດປະສົງ ແມ່ນຜ່ານຮ່າງນະໂຍບາຍອຸດສາຫະ ກຳສີຂຽວ ເພື່ອໃຫ້ຜູ້ເຂົ້າຮ່ວມປະກອບຄຳເຫັນໃສ່ ເພື່ອຈະໄດ້ນໍາມາປັບປຸງໃຫ້ໂຄງຮ່າງ ແລະ ເນື້ອໃນ ຖືກຕ້ອງ, ສົມບູນ, ສ້າງຄວາມເປັນເອກະພາບ ແລະ ສອດຄ່ອງກັບນະໂຍບາຍ, ນິຕິກໍາ ແລະ ລະບຽບການທີ່ກ່ຽວຂ້ອງ ທັງພານໃນ ແລະ ສາກົນ ອີກດ້ວຍ.

ຜົນການຈັດຕັ້ງປະຕິບັດວຍກງານໂຄງການຜ່ານມາ ຄື:

ສ້າງຮ່າງນະໂຍບາຍອຸດສາຫະກໍາສີຂຽວ.
ສ້າງຄູ່ມືແນະນໍາການນຳໃຊ້ພະລັງງານຢ່າງມີປະສິດທິພາບ ໃນຂົງເຂດອຸດສາຫະກໍາ ຂອງ ສປປ ລາວ
ຄັດເລືອກບັນດາໂຮງງານອຸດສາຫະກໍາ ຈໍານວນ 25 ແຫ່ງ ຈາກ 3 ກຸ່ມໃນຂອບເຂດທົ່ວປະເທດ ຄື: ກຸ່ມອຸດສາຫະກໍາຕັດຫຍິບ, ກຸ່ມອຸດສາຫະກໍາປຸງແຕ່ງວັດສະດຸກໍ່ສ້າງ ແລະ ກຸ່ມອຸດສາຫະກໍາປຸງແຕ່ງຜະລິດຕະພັນຈາກກະສິກໍາ ພ້ອມທັງລົງກວດສອບການນຳໃຊ້ພະລັງງານ (Energy Efficiency Audit) ຂອງໂຮງງານ.
ຝຶກອົບຮົມໃຫ້ພາກລັດ ແລະ ພາກທຸລະກິດ ໃນຫົວຂໍ້ “ທັກສະການກວດສອບພະລັງ ງານ ແລະ ບໍລິສັດບໍລິການດ້ານພະລັງງານ”.

ປຶກສາຫາລື ຕໍ່ແຜນວຽກຈະສືບຕໍ່ຂໍການຮ່ວມມື ກັບ ສະຖາບັນເຕີບໂຕສີຂຽວສາກົນ (GGGI) ຂອງບາງຂົງເຂດວຽກງານ ເປັນຕົ້ນ 1) ໂຄງການ ການນໍາໃຊ້ 3 R (Reuse, Recycle, Reduce) ເຂົ້າໃນໂຮງງານອຸດສາຫະກໍາ ແລະ ການນໍາໃຊ້ສິ່ງເສດເຫຼືອເປັນເຊື້ອເພີງ (RDF) ໂດຍສະເພາະໂຮງງານຊີມັງ. 2) ໂຄງການ ຜະລິດອາຍແກສຊີວະພາບຈາກນໍ້າເປື້ອນຂອງໂຮງງານອຸດສາກຳປຸງແຕ່ງຈາກຜະລິດຕະພັນກະສິກຳ ແລະ 3) ໂຄງການ ສໍາຫຼວດຂໍ້ມູນ ແລະ ສ້າງລະບົບບໍາບັດ ແລະ ກໍາຈັດສິ່ງເສດເຫຼືອອັນຕະລາຍຈາກໂຮງງານອຸດສາຫະກໍາ ໃນ ສປປ ລາວ.