ກອງປະຊຸມຄັ້ງປະຖົມມະເລີກການຮ່ວມມືສອງຝ່າຍ ລາວ-ລັດເຊຍ ກ່ຽວກັບການນໍາໃຊ້ທາດໄຍຫີນຂາວຢ່າງປອດໄພ
ໃນວັນທີ 8 ກໍລະກົດ 2022 ກົົມອຸດສາຫະກໍາ ແລະ ຫັດຖະກໍາ, ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມປຶກສາຫາລື ລະຫວ່າງຄະນະຊ່ຽວຊານຝ່າຍລາວ ຮ່ວມກັບຄະນະຊ່ຽວຊານ ສ.ລັດເຊຍ ກ່ຽວກັບການຮ່ວມມື ສຶກສາການນໍາໃຊ້ທາດໄຍຫີນຂາວ ແລະ ວັດສະດຸທີ່ມີສ່ວນປະກອບຂອງທາດໄຍຫີນຂາວ ຢູ່ ສປປ ລາວ ໃນຮູບແບບກອງປະຊຸມທາງໄກ ໂດຍການເປັນປະທານຂອງທ່ານ ປອ ບົວວັນ ວິລະວົງ, ຫົວໜ້າກົມອຸດສາຫະກໍາ ແລະ ຫັດຖະກໍາ ໂດຍມີຜູ້ເຂົ້າຮ່ວມຈາກ ກະຊວງການຕ່າງປະເທດ, ກະຊວງສຶກສາທິການ ແລະ ກິລາ, ກະຊວງແຮງງານ ແລະ ສະຫວັດດີການສັງຄົມ ແລະ ສູນມະເຮັງໂຮງໝໍມິດຕະພາບ ແລະ ເຂົ້າຮ່ວມຝ່າຍລັດເຊຍປະກອບມີ ກົມໂລຫະວິທະຍາ ແລະ ວັດຖຸ, ກະຊວງອຸດສາຫະກໍາ ແລະ ການຄ້າ ສ.ລັດເຊຍ, ສະຖານທູດລັດເຊຍປະຈໍາລາວ, ກະຊວງພັດທະນາເສດຖະກິດ ສະຫະພັນລັດເຊຍ, ສະຖາບັນທາດໄຍຫີນຂາວ ສ.ລັດເຊຍ, ສູນພັດທະນາເຕັກໂນໂລຊີ, ສະຖາບັນຊັບພະຍາກອນແຮ່ທາດ ແລະ ສູນການວິເຄາະຂໍ້ມູນຂ່າວສານກ່ຽວກັບກິດຈະກໍາການຄ້າຕ່າງປະເທດ, ກະຊວງອຸດສາຫະກໍາ ແລະ ການຄ້າ ສ.ລັດເຊຍ.
ກອງປະຊຸມໄດ້ປຶກສາຫາລືກ່ຽວກັບການຮ່ວມມືລະຫວ່າງລາວ ແລະ ລັດເຊຍ ດ້ານທາດໄຍຫີນຂາວ (Chrysotile) ພາຍໃຕ້ກອບສັນຍາຮ່ວມມືຄັ້ງທີ 15 ລະຫວ່າງສະຫະພັນລັດເຊຍ ແລະ ສປປ ລາວ ວ່າດ້ວຍການຮ່ວມມືເພື່ອການຄ້າ, ເສດຖະກິດ ແລະ ວິທະນາສາດ-ເຕັກນິກ, ຊຶ່ງທັງສອງຝ່າຍໄດ້ແລກປ່ຽນຂໍ້ມູນກ່ຽວກັບສະພາບການຄຸ້ມຄອງຄວາມປອດໄພໃນການນໍາໃຊ້ທາດໄຍຫີນຂາວຢູ່ ພາຍໃນປະເທດຂອງຕົນ ແລະ ປຶກສາຫາລືກ່ຽວກັບການສືບຕໍ່ຮ່ວມມືກັນດຳເນີນການສຶກສາດ້ານການນໍາໃຊ້ທາດໄຍຫີນຂາວ ແລະ ວັດສະດຸທີ່ມີທາດໄຍຫີນຂາວເປັນອົງປະກອບ ຢູ່ ສປປ ລາວ. ພ້ອມກັນນັ້ນສະຫະພັນລັດເຊຍໃນນາມເປັນຜູ້ຜະລິດ ແລະ ສະໜອງທາດໄຍຫີນຂາວລາຍໃຫຍ່ທີ່ສຸດໃນໂລກ ທີ່ມີປະສົບການດ້ານການຄຸ້ມຄອງຄວາມປອດໄພໃນການຂຸດຄົ້ນ ແລະ ນໍາໃຊ້ທາດໄຍຫີນຂາວມາກວ່າ 130 ປີ ມີຄວາມຍິນດີທີ່ຈະແບ່ງປັນຂໍ້ມູນຂ່າວສານ, ຄວາມຮູ້, ປະສົບການ, ເຕັກນິກ ແລະ ເຕັກໂນໂລຊີໃນການຄຸ້ມຄອງການນໍາໃຊ້ທາດໄຍຫີນຂາວຢ່າງປອດໄພ ກັບ ສປປ ລາວ.
